هاشربها يعني هاشربها

العالم متكاتف ضدي .. الدنيا معنداني
ليه كمية الاضطهاد ده؟!! .. أرحموني
أنا بس كنت عاوزة كوباية الشاي دي .. كان نفسي وقتها أشرب شاي وبإستماتة طالبت بده
قالولي الساعة 2 و البوفيه قفل!!
قفل!! .. يعني ايه قفل؟!! .. يا أوغاد يا كلاب .. حراااااااااااااااااااااااااااام إزاي يقفل وإحنا بنروح 3؟
إفرض فيه ظابط قال عاوز اتزفت اشرب شاي مش هايدخلوا يعملوله شاي؟
ولا إحنا زفت الطين سخام البرك المكأفاة اللي وقعوا من قعر القفة وولاد البطة الفزدقي .. اللي كل حاجة لازم تتقال لهم .. لأ ومش من حقكم و قفل!! .. خلاص بح ومفيش!!
بلطجة على قلة أدبكم .. هاشرب الشاي بعد كده وجوا المعمل كمان .. هه!!
محدش أحسن من حد.
أخترع أنا نظرية خد كوبايتك من الاستراحة واشربها في المعمل .. فليضرب كل من يعترض نفوخه في أقرب حيطة ناشفة.
تحوذ النظرية على إعجاب الجماهير .. يخجلون من تسريب أكواب الشاي أو فنجاين القهوة .. اتطوع لتسريبها.
شيئًا فشيئًا .. الدنيا تبقى هيصة وبقت سبهللة خلاص ... أكياش سيبسي، كوبيات شاي، مولتو وتودو .. والكل بيعزم على كله.
محدش بيشتغل وبقه فاضي ... النظرية بتقول لازم تغذي فرد المعمل عشان يشتغل بكفاءة.
الظابط يقتحم باب المعمل .. مغتاظّا وشه أحمر زي الطماطم وعينه بتطق شرار ... يعب نفس عميق ويقول بعلو صوته:
"مفيش اكل جواااااا المعممممممممممممممممممممممللللللللللل ... فاهممممممممممممميييييييييييييييين" .. "عندكم الاستراحة اعملللللللللوا ماااااااااااااااا بدااااااااااالكم" ...
الراجل ده أكيد بيشرب حاجات سخنة كتير .. ينظر بشرانية لكل واحد فينا .. إسماعيل كان بيمضغ حتة بيك رولز .. قام احتفظ بيها في سقف حلقه ويمكن وقفت في زوره.
خرج الظابط متنرفزًا والشياطين بتلف حواليه في كل حتة .. وسايب شوية عفاريت وراه.
كله مش قادر ينطق، محدش عارف يقول ايه .. الصمت الصمت الصمت
ثم تشششششك .. صوت مضغ بشكل متتالي .. كلنا نبص لعمرو وهو فاتح كيس شيبس عائلي وبيقولنا بكل براءة .. "تاخدوا حتة"
نقعد نضحك ونضحك بهيستيريا ... يقول عمرو: "خلاص يا كلاب ولا واحد هياخد حاجة .. ممنوع الاكل في المعمل .. هو بيت ابوكم .. انتم مكأفاة يا كلاب" ... محدش قادر يمسك نفسه من الضحك.
تبصلي أسماء وتقولي بهدوء : "انتي السبب" .. " فاكرة اما سربتيلي فنجان القهوة"
أضحك وأحس لأول مرة أن التمرد حلو وأن كلنا بنضحك ومحدش تعبان

خطط للسينما، الجمعة الصبح ... نفسي في مج نسكافيه
عااااااااااااااااااااااااااااااااااااااااااا ... فيييييييييييييين النسكافيه يا هبابة يا رحاب
خلص خلص خللللللللللللللللص
هي بتسفه ولا ايه .. يخرب بيت الامتحانات وسنينها
انزل بسرعة والحق سينما 10 الصبح في ستارز
ريحة القهوة في مراخيري .. حرام يا جدعان .. نفسي فيها
اقف قدام كوستا جنب السينما، افضل متنحة باشم في ريحة القهوة وافكر نفسي بكل جزء جوايا .. ممنوع الدخول السينما بأي اكل او شرب
أتفرجي واشربي بعدين
ادفع، ادخل .. اقف قصاد الكافيتريا .. مياة ساقعة، مناديل .. ألمح عدة للقهوة والكابتشينو .. أعدل الطلب وأزود كوباية كابتشينو.
أدخل الفيلم معتزة بالكوباية جدًا .. أمسك بإيديا وأحضنها ويبدأ التتر
أصرخ لما أشوف أسم جاري أولدمان ... فرجت السينما عليا ... عااااااااااااااااا جااااااااااااااااااري @_@
اقلب قهوتي واشم ريحتها .. غريبة!! .. بس هاشربها يعني هاشربها.
اخد اول رشفة ... O_O ... يوووووووووووع .. يععععععععععععععععععععععععع ... الله يقرفكم .. إتففففففففففففففووووووووو
ده كابتشينو ده ... ده حتى منظر كوباية فيها ريحة قهوة ... ده رغاوي على كريمة على مياة سخنة وسكر ... روحوا جتكم القرف.
أخد بق كمان يمكن متهيألي ... لألألألألألألأ دي مش قهوة فعلا ..
امسك الكوباية واحسر نفسي أني ضاعت مني لذة كوباية الكابتشينو اللي نفسي فيها من صباحية ربنا
يتعاظم الشعور أن العالم فعلا متكاتف ضدي ومانعني أني أشرب أي حاجة وكل حاجة عاوزاها
فضلت أفكر ساعة البريك بتاع الفيلم .. هو ينفع أخرج وأسرب كوباية كابتشينو موكا من كوستا زي ماعملت في الشغل.
هيهااااااااااااااااااااات
الدنيا معنداني
حتى في كوباية الشاي
حتى في إحساس النسكافيه وريحة القهوة

وبعدين وياكي بقى :@