الوقت بيجري بجد، كل حاجة بتروح والوقت بيجري وبيتسرق مني.من كام شهر .. كنت عمالة أقول ياااااااااااه بابا قرب يسافر .. بابا هايسافر خلاص في شهر خمسة!!!
للصدمة وللسرقة الوقت الرهيبة ... شهر خمسة خلاص واقف على عتبة شهر أربعة وبيخبط.
كنت في كوستا من يومين تلاتة كده .. دينا أختي خدتني نسترجع ذكريات كوستا المهندسين وشغل مجلة جودنيوز المدمر.
قعدنا نضحك ونهزر ونتكلم وكل واحد يبوح بمكنون صدره .. حكيت لها عن أحلامي الغريبة !
سكتت كتير وقالتلي ببساطة عقلك الباطن زعلان منك أوي!!
أنتي جواكي مش زي مانتي متخيلة أصلا، هو أنتي مبتكلميش حد يا بنتي تحكي معاه؟!
بحب أوي لما أروح مكان وتشتغل أغنية بحبها وأحس أني الوحيدة في المكان اللي أعرفها وبأبقى عاوزة أقوم أتنطط وأغنيها
حصل كده زمان مرة في كوك دور أشتغلت أغنية Zombie لـCranberries
بأتضايق اوي لما أروح مكان وتشتغل أغنية بحبها لكن بتشتغل في وقت باتكلم فيه عنك وكنت باسمعها لما كنت زعلانة منك
في كوستا أشتغلت أغنية Hide and Seek لـ Imogeen Heap
قعدت أغني معاها وأنا زعلانة بجد ... في العربية، الأغنية دي مبتتشالش من قايمة الأغاني ودايما بأسمعها.
المرة دي سمعتها وأنا مبفكرش غير فيك.
حطيت أمنيتي في نجمة وبعتها للسما .. يارب يوصلك أني لسة بأفكر فيك.
تخاريف قديمة لازم تطلع من الصندوق الألكتروني ده
ليست هناك تعليقات:
إرسال تعليق