بتسمع كتير، بتقرأ كتير، بتشوف كتير، بتختبر حاجات كتير.
يبقى اكيد اتشليت برضه كتير زيي.
المشكلة بتكمن أن العالم اتغير كتير، الوقت اختلف والتوقيت أصبح كمان مختلف عن زمان. بقى فيه حرية تعبير ووسائل تعبير كتيرة وبكل الطرق وكمان بكل اللغات من أول العربي بتاعي وبتاعك لحد الفرانكو-ستيوبد-آراب اللي بيتكلم بيه بقية المخلوقات الجديدة أو المستجدة في كل حتة في الانترنت.
مش عارفة ليه المرة دي بالتحديد الكلام طالع معايا بالعامية كده، مش عاوز يطلع فصحى يمكن عشان لو شتمت ولا حاجة ميبقاش شكله مبتذل جنب روعة الكلام باللغة العربية المبجلة. الواحد فعلا اتشل، انتشرت الشبكات الاجتماعية باختلاف اشكالها وطبعا الرائد او المتصدر هو الفيسبوك بكل جدارة. الناس هناك اشكال والوان وطبائع ومناظر غير غير غير غير والله. مش محتاجة اعبر يعني ولا اوصف.
مش هانتقد الصفح العبثية ولا المجموعات اللي بلا هدف بس لمجرد تجميع أكبر عدد ممكن من اللايك، اللي برضه ايه سببه غير معلوم. يعني مثلا انا لو عملت لايك، كسبت ايه، طب لو معملتش خسرت ايه. برضه الله أعلم. طب لما أعمل اللايك المتين، هل صاحب الصفحة استفاد ولا قام سجد ركعتين شكر لربنا على كم اللايك المهول ولا ايه بالظبط.
متفهمش بس برضه، على رأي المقولة الاجنبية الشهيرة اياها في فيلم "فورست جامب" الغباء كما يفعل الغبي .. لا سمح الله انا مبوصفش حد بالغباء، بس كل واحد موصوف بما يفعل بالظبط. فلو انت اقصى اهتمامك انك تجمع كام لايك وتحس ان ده مجهود جبار وحاجة تحفة ولا جامدة جدي .. تبقى حط لنفسك وصف جامد كده برضه يا خفيف.
كمان فجأة تلاقي كل سيزون معاه الفيس ينتشر بطابع ما، ومش شرط السيزون يعني. ممكن كل موقف، كل فترة، كل حدث.
الاسرى يضربوا عن الطعام. كله يرزع الصورة اياها ويقولك متضامن وهاضرب رغم اني طالب وباذاكر، وهو اكيد اكيد مج النسكافيه وساندوتش كوك دور مش مفارق ايده يعني، ده على وش امتحانات يا جدعان يعني. تلاقي مذابح في بورما، كل الصفح فجأة تنتشر بالصور المروعة مليانة دم وجثث ويقولك فين الأمة الاسلامية، فين المسلمين؟ .. طب انت فاكر انك لما تنشر الصور، انت شاركت كمسلم بحاجة. انت بس يعني يمكن حسست نفسك من جوا عشان ترتاح نفسيا انك مش سلبي. بس برضه مش هي دي الايجابية يا راجل منك له. الايجابية بتتم بأمور أكبر من كده بكتيييير. والايجابيين عارفينها كويس أوي. وبعدين لو كان قادة الدول الاسلامية الأسيوية (في قارة أسيا يعني) عرفوا يعملوا حاجة لبورما كنا نهضنا إحنا نعمل حاجة. ولو كنا قدرنا نساعد ليبيا ولا سوريا ولا السودان ولا حتى نساعد نفسنا، كنا عملنا لبورما حاجة. فبجد بجد بجد الناس اللي ع الفيس بتحب تعيش في الدور.
ولا لما يجي سيزون ديني مثلا. وتلاقي فجأة كل الكلام والصور والبوست والتعليقات، دعوات وأيات قرأنية و سور وخلافه. وكمان صورة الاسير المضرب عن الطعام تروح، وصورة قتلى بورما تروح، وتلاقي بقى صورة بنات محجبة او صورة واحد بيدعي او يمكن صورة كنافة بالمانجا مش عارف بكام من لابوار .. ومين يقولك ياما نفسي اشرب مياه، وتبتدي ايفهات كل سنة عن رمضان والصيام والمياه والاكل واللذي منه. طيب يعني هي المحجبة مش محجبة من زمان، ومقتنعة ان صورة البنت المحجبة مبتطلعش الا في سيزون رمضان. ليه؟؟ هو ده مش مبدأ؟ مش ده أسلوب حياة. مش حجابك حياتك. ليه الصور كلها عندك بنات بشعر وكلام جميل ولما يجي رمضان تطلع البنت المحجبة اللي بتدعي واللي بتقرأ قرآن. يعني بمعنى أصح أنتي بكذا وش.
ولا عشان منجنيش على حد. المفروض أن العبادة حاجة بينك وبين ربنا. تقرأ أية تدعي دعاء تصلي تصوم، محجبة ومقتنعة ان مينفعش تحطي صور بنات مش محجبات، يبقى على طول الخط. مش لمجرد سيزون وشكرًا واول ما العيد يجي تلاقي الصور طلعت بلالين ومونيكير وكحك وفلوس وبنات بتنط وولاد بتتشقلب.
اللي يضايق مش ان واحد واتنين يعملوا كده. صورة وخلاص، لا بتلاقي كله بيعمل شير. كله بيقلد. كله بيعيش في الدور.
كأن مفيش قرآن الا في رمضان. مفيش حجاب إلا في رمضان. مفيش صيام إلا في رمضان. مفيش إلتزام إلا في رمضان.
بجد اللي بيشل أكتر .. بيشل أوي .. كمية الناس اللي عايشة فاكرة الفيسبوك وكالة رويترز للأنباء. أنا أكلت، أنا شربت .. طب بالهنا يا عين أمك. أنا رحت السينما والفيلم كان جامد. ضاعت مني البتاع مش عارف ايه. انا نايم ع السرير وبالعب في صوابع رجلي. انا باكل مانجا وصباع حشيش.
ايه يا جدعان!! حد قالكم ان حياتكم بتلك الفظاعة والجمال والاهمية لينا يعني. أنا مال أهلي اعرف انت بتعمل ايه في الحمام دلوقتي يعني. الناس دي اتجننت في عقلها ولا ايه؟!!
اقصى ما قد يكون شخصي عشان يتكتب ع الفيس .. هو احساسك، رأيك تجاه حاجة. لكن دلوقتي بما اننا في عصر الحرية والثورة ويلا كله يعبر .. فيلا يا معلم .. متهيئلي لو واحدة كتبت انها انهاردة جالها امساك في الحمام وتعبت اوي. الكل هايدخل يقولها تجربته مع الامساك وربنا يشفيها وتاخد ادوية ايه.
بجد الفيس بقى مزبلة.
نهايًة ... ربي هو الشافي.
