وخاصمني النوم

من الغريب أن بتيجي أيام بأنام فيها زي الفيل .. فعلًا زي الفيل.
وأيام مبعرفش حتى أغمض عيني.

قللي يا سارة كمية الكافيين .. قللت زفتة كمية القهوة والشاي وكل ما يمكن يكون لونه أسود .. مبقتش أحاول الشرب إلا للضرورة.
طب ها .. إيه اللي حصل؟ .. نامت سارة يعني!! .. تؤتؤ معتقدش!

الفترة دي مملة وصعبة .. مرحلة دخول الصيف بكامل تقله وحجمه ورخامة جوه وقلة أدبه بقى
كل حاجة لا يمكن إنجازها بكفاءة .. مينفعش تتفرج على فيلم من غير ملل .. الجو ملزق بشكل غير عادي .. العرق بيخرج من كل حتة وبشكل غير طبيعي.

حتى المواعين .. المواعين مبقاش ينفع تتعمل إلا والمروحة شغالة والمياة مغرقة الدنيا وبعدين يتاخد الدش المتين.
الجري والرياضة .. بقوا مأساة محققة .. الواحد بيعرق أصلا من غير مجهود .. هئ فلنتخيل بذل مجهود بدني هائل لمدة تقترب من الساعة إلا ربع .. إيه هايكون منظري!! ... انا بيجي لي جفاف وريقي بينشف.

أجي بالليل بقى .. أحط رأسي على المخدة .. يمين شمال .. دراعي فوق رأسي .. دراعي تحت رأسي .. ايدي على خدي .. شوية وهاقوم اتشقلب واقلب قرد .. مفيش .. مفيش مفييييييييييييييش .. مش عارفة أنام بسلاسة ويسر.
فجأة معرفش منين .. اصحى بعد ساعة ونص اني نمت شوية كده اللي هم ساعة ونص يعني مش محتاجين ذكاء .. واحاول من أول وجديد .. يمين ثم شمال .. دراعي فوق رأسي .. دراعي تحت رأسي .. ايدي على خدي .. شوية وهاقوم اتشقلب واقلب خنفساء ... مفييييييييش

افضل على الوضع ده للفجر .. أصلي وانام .. أو بالأحرى أحاول انام.
معرفش الساعة بتيجي ازاي 6 ثم اجبر نفسي انام تاني لحد 7 ونص .. وهكذا اصحى جسمي مكسر .. دماغي مصدعة .. عيني منفخة ومحمرة جدًا ... ويتكرر السيناريو كل يوم .. كل يوم
ليه كده بس !! .. حراااااااااااام انا ورايا أشغال برضه

وخاصمني النوم
يعني بأنام تخاطيف ..

لماذا ..

أكرهني حين اتحلى بالغباء الكامل .. آآآآآآآآآآآه
لماذا يتوقف عقلي أحيانًا عن التفكير السليم المنطقي .. فيصبح بطيء كالسلحفاة البلهاء؟
لماذا أصاب بعقدة "كوني طيبة، كوني حليمة، كوني أكثر حكمة ولا تنبثي ببنت شفة فالموقف لا يحتمل" .. فأصبح بالنهاية سلبية وغبية؟

لماذا يظن الجميع أنني ضعيفة وعديمة الخبرة لمجرد كوني صغيرة السن؟
لماذا تظن أمي على العكس أنني كبرت في السن وأيضًا عديمة الخبرة؟

لماذا يرى الأصدقاء أنني دومًا التي ستبتعد وتنأى بنفسها في حين أنهم ليسوا على تلك الدرجة من الاهتمام بشخصي كذلك؟
لماذا بعد أن وضع أخوتي أنفسهم في موضع "عدم محل ثقة" .. يتهمونني أنا بأنني لست محل ثقة وأستحق أن يحدث لي ذلك كوني أحتفظ بأسرار لنفسي؟

لماذا أشعر فجأة أن الخطط يجب أن تتوقف وأنني لا أستطيع إنجاز أي شيء؟
لماذا يتملكني إحساس ما بأنني أختنق وأود الهرب؟ لماذا يظن الجميع أنهم يفهمونني في حين أنني شخصيًا لا أفهم ذاتي وتفكيري وقلبي؟

لماذا أمتلئ بتناقضات لا أفصح عنها ولا أستطيع؟
أكرهني لتساؤلاتي الكثيرة وتفكيري الزائد عن حده .. أكره تعقيدات حياتي بشدة

Bella Notte

يا ترى ايه فكرة جنى عن عيد ميلادها الثاني؟!!
أن الموبيل طول الوقت في ايدها ومتسيبهوش .. واحنا نتنطط ونرقص ونهيص وهي كالعادة لازقة وشها في الموبيل وسارحة في ملكوت أخر.
أن لما الأغاني تبطل فجأة .. تصرخ بصوت عالي أوي .. "ياي ياي ياي ياي يييييييييي" .. ودي معناه أنها بتطلب أغنية معينة ولازم نشغلها فورًا وإلا هاتنكش شعرها وتجري معلنة غضبها وسخطها على كل البشر.
أن لما نيجي نتصور .. مينفعش نتصور من غير ما نحط إيدنا على خدنا .. لزوم الصورة التحفة مع البرنسيسة جنى، حط ايدك على خدك!! .. لازمن ولابد وإلا جنى هاتفضل مكشرة ومش هاتضحك خالص.
أن قبل ما نطفي الشمع بربع ساعة، هي يحل عليها النوم .. ولازم تنام فعلاً .. ونفضل نحاول محاولات مستميتة نصحيها وتقوم كأنها مضروبة 600 جزمة.
أن طول الحفلة وطول وقت التقطيع والأكل والغناء والهدايا .. جنى قاعدة في حجر جدها مش عاوزة تتحرك ولا تقوم ترقص ... وإحنا خلاص مروحين ماشيين تنشط فجأة وتقوم معيطة معلنة رفضها أننا نمشي بدري كده. .. أصيلة يا جوجو!!

يا ترى إيه فكرتنا كلنا عن عيد ميلاد جنى الثاني؟
هانرقص .. وهانرقص .. وهانرقص .. وهانرقص في الجنينة .. قبل ما الرجالة تنزل.
تزيين الجنينة نفسه كان أمتع وقت وكل شوية بالونات تفرقع أو تطير ونجري نلمهم.
لما أحمد قرر يعلن أن موسيقى حفلة عيد ميلاد جنى لازم تكون موسيقى ياباني من فيلم اكشن بيحبه وهو Kill bill .. صدعنا شكرًا
دينا ونسمة والمعاناة المعتادة مع "حماتي حياتي" .. مسلسل الموسم وكل موسم .. مسخرة أبدية!!
الرقص والرقص والتصوير والتصوير والضحك والضحك والكثير من الفرهدة والمزيد من الرقص السلو على أغنية Bella notte التي تعني بالايطالية ليلة جميلة.

Now This is The Night
It's A Beautiful Night
And We Call it Bella Notte

ما بعد الحفلة ... تنظيف ولم وضحك وشيل كراسي وحط كراسي .. تصوير تصوير تصوير

في العربية .. نوم عميييييييييييق .. بالنسبة لي كفاية اوي اصحى من 7 الصبح اروح شغلي واركب الاتوبيس ينزلني عند 6 اكتوبر واول 4و نص وابتدي تنظيم حفلة وتظبيط ولحد 10 ونص عمالين نفرهد في بعض كده في الهواء الطللللللللللق.
كان لازم أنام ... صحيت على مدخل العمارة
كدت أن أبوس تراب الوطن ... عدنا سالمين .. احمــــــــــــــــــــدك ياااااااااااااااااااااااااااااا رب

اليوم خولوص .. ولقد كانت ليلة جميلة بحق!!

I To You Give Love

Smile, for your lover comes.
Prodigal, you have given me love--therefore I to you give love!
O unspeakable passionate love.